مسرحية عيد الام للأطفال فقط :)

مسرحية عيد الام ...

الجزء الاول استيقاظ الطفل

هاااااااااااااااااااوم ( صوت تثائب) واووووووو اوووووووووو (صوت ديك) ترررررررررررن ترررررررررررررن( منبه)
حماده: عااااااايز انام . مفيش مدرسه النهارده الحمدلله.
الام: يا حبيبي النهاردة الحد. يا بني قوم يا عنيا
انت كل يوم بتتعبني كده
حماده: يا ماما النهارده اجازه. عشان عيد الشجرة
الام:عيد شجره اييه مفيش اعياد
انت كل يوم بتقول كده
كل يوم تطلعلي عيد جديد على كده السنة كلها أجازة

حماده: ايه ده السنه طلعت كلها اجازه. احمدك يارب. هاااااااااااااااااااااااااااااااااااااوم
الام: ما تقووم.... الله .ولا اناديلك ابوك
قوم والله لأجيب المية
حماده: لااااااااااااااااااا خلااااااااااااااااااااااص هقووووم اهه
ادينى بس نص ساعه عشان كنت فى نص حلم مهم يا ماما
هكمله واجى على طووول. عشان المدرس كان بيزاكرلنا هناك حته مهمه قوووى مكنتش فاهمها

الام: ما تقوم يا ابنى بطل دلع.
قوم يا حبيبى وبكره تبقى تكمل الحلم. ولو مش فاهم قولى وانا ازكرهالك
حماده: تزاكريلى ايه . خلاااااااااص انا هقوووووم خلاااااااااااااااص
اوعى تكونى عملتيلى سندوتشات مربى مش بحبهاااااااااااااااااااااااااااا
الام: لا عملتلك جبنة هي دي السطوانة اللي انت حفظها
هو انا لازم كده كل يوم افضل معاك ساعتين عشان تصحى

يقوم وهو قرفان . ويتخبط فى كل ركن فى الاوضه متوجها لغسيل الوش
دب دب دب (صوت تخبيط على باب الحمام) الى من الواضح انه نام جوه بردو

الام: انت نمت جوااااااااا افتح يا موكوووووووس
بعد تخبيط على الباب . يصحى الاستاذ من الحلم الى كان بيكمله جوا فى الشور ويطلع عشان يفطر ويروح على المدرسه
حماده: مربى ليييييييييييييه دى المربى دى رخمه قوووووى
. بردو عملتيلى سندوتشات مربى. يارب مصانع المربى كلها تقفل عشان ترتاحى يا ماما

الام: بقولك مش مربى ربنا يهديك يا بني دي جبنة
حماده: امال شكلها يدى على مربى لييه. والله ادخل انام تانى
الام: ارجع يا مجنوووووووون هتجننى معاك

حماده: وكمان جبنه رومى. ميدو الى قاعد جنبى فى الفصل مش بيحب الجبنه الرومى
الام: وانت بتاكلها انت ولا ميدو
حماده: مش هتفرق كلنا اخوات يا ماما. ده ايه ده
الام: طيب يا حبيبى. خد بالك من الطريق وكل سندوتشاتك واقعد عاقل في الفصل
الطفل: اقعد عاقل فى الفصل على اساس انى بقعد على راسى

الام: لا ماهو المدرسين بيوصلولى اخبارك. كل يوم استدعاء
حماده: ده هما الى مش بيحبونى عشان انا اشطر منهم
الام: اه صح انت اشطر من المدرسيين . باماره الكحك بتاع شهادة كل شهر. يلا روح المدرسه بدل ما تتاخر
الطفل: هتدينى المصرووف ولا هقول الراجل ماما بتسلم عليك وبتقولك ركبنى معاك
الام: خد يا لمض خد
--------------------------------------------------------------------------------------------
الفصل التانى فى الشارع

(ينزل الطفل فى الشارع . يمشى فى الشارع شويه . يقابل ميدو و هايدى. ميدو نفس سن حماده. وهايدى اكبر منهم بسنه او سنتين)
ميدو: ازيك يا حماده.
حماده: كويس الحمدلله بس زهقان قوى من المدرسه ومش عايز ارووح
ميدو: ولا انا عايز اروح بس لازم نتعلم يا حماده
هايدى: انا بقى عايزه اروح . عشان انا امبارح عملت حاجه جميله قووى . المدرسه قالتلى عليها .
ميدو وحماده باستغراب: ايه هيا الحاجه دى
هايدى: المدرسه قالتلنا كل واحد يختار الوره الى بيحبها ويزرعها وييجى كل يوم يرويها . والورده هتفضل معانا طول سنين المدرسه وفى الاجازه هما هيخلو بالهم منها.
ميدو: وانتى بتعرفى تزرعى
هايدى: الاول مكنتش اعرف بتتزرع ازاى. بس المدرسه علمتنا ازاى نزرعها وانا هاجى كل يوم عشان ارويها واقعد معاها فى الفسحه عشان اخلى بالى منها
ميدو: انا بحب الورد جدا. انا كمان هروح للمدرسه اطلب منها تعلمنى ازرع ورده ازاى. واسمى الورده بتاعتى. وردة الصراحة عشان كل يوم اجى احكيلها انا عملت ايه
هايدى: وانا هسمى بتاعتى وردة الامل. عشان لما اشوفها بتكبر قدام عينيا. بتدينى امل فى الحياة
حماده: بس انا مش بحب الورد
هايدى: خلاص اختار حاجه تكون بتحبها.
حماده: انا بحب النوم
هايدى: هههههههه لا حاجه ينفع تعملها فى الفصل يا حماده.
حماده: ما انا ينفع انام فى الفصل يا هايدى.
هايدى: لا لا غلط . النوم بيكون فى البيت بس. لكن فى المدرسه اختار هوايه ليك تكون بتحب تعملها.
حماده محتار: بس انا مش بعرف اعمل اى هوايه.
هايدى: فاكر يا حمادة لما رسمت السنه الى فاتت صورة للمدرسه و الفصل كله كان بيسقف.
حماده: اه فاكر . بس ميدو مكنش بيسقف عشان كان بياكل.
هايدى: سيبك من ميدو. المهم انك بتعرف ترسم ولازم ترجع ترسم تانى. كل يوم فى الفسحه ارسم رسمه حلوه وعلقها وشوف الناس هيقولولك ايه عنها.
حماده: بس ارسم عن ايه. مش عارف
ميدو: طبعا عن عيد الام . النهاره عيد الام يا حماده.
حماده: هو النهارده عيد الام يعنى اجازه صح؟؟
ميدو: لا طبعا. النهارده عندنا حفله بعد المدرسه لكن هنروح بردو.
هايدى: انتو بتقولو ايه بس. هو انت مكنتش تعرف يا حماده. امال جبت هديه ازاى لمامتك
حماده: انا نسيييت خااااااااااااااالص
هايدى: يا حماده مش قلنالك الاسبوع الى فات عشان تحوش فلوس وتجيب هديه
حماده: طب انا نسيت اعمل ايه انا دلوقتى.
هايدى: معرفش بقى بس يلا احنا وصلنا للمدرسه خلاص. تبقى تفكر بعدين
حماده: بس معنى كده ان ماما جايه النهارده الحفله . وانا مجبتش اى هديه خالص
ميدو: انت الى غلطان عشان كلنا قلنالك.
--------------------------------------------------------------------------------------------------------
الفصل التالت فى المدرسه:

ميدو: ايه يا حماده مالك سرحان كده
حماده: انا زعلان قوى من نفسى عشان مجبتش اى حاجه لماما
ميدو: ولا تزعل نفسك يا حماده كلنا هنساعدك
يدخل المدرس)
المدرس: ازيكم كلكم والنهارده هنتكلم عن حاجه مهمه. عن عيد الام. واتمنى ان كلكم تكونو جبتو هديه لماماتكم. عشان كل واحد هيدى مامته هديه فى الحفله النهارده. وعايزين نعرف من كل واحد جاب ايه لمامته
انجى قوليلنا جبتى ايه لمامتك.
انجى : انا واختى جبنا لماما جزمه.
المدرس: يارب ما تضربكم بيها. بس جميله يا انجى. وانت يا ميدو
ميدو: انا جبت لماما برفان
المدرس: جميل قوى ذوقك يا ميدو. وانت يا حماده جبت ايه لمامتك
حماده: انا ..... انا.........
المدرس: ايه حاجه كبيره قوى كده
جماده: لا لا بس.....
المدرس: ما تقول يا حبيبى جتب ايه
حماده: بصراحة بقى انا مجتبش حاجه بس عشان انا والله نسيت.
المدرس: نسيت يا حماده؟؟؟؟؟ انت بتهزر صح؟؟؟
حماده: هو ميدو قالى من اسبوع بس انا معرفتش اجيب اى حاجه.
المدرس: عشان انت طفل مستهتر ومش بيهمك حاجه.
حماده وهو يبدا فى العياط: بس انا بجد نسيت. وانا والله بحب ماما بس هى الى بتعملى سندوتشات مربى مش بحبها
المدرس: خلاص يا ميدو متعيطش. بس انت هتكون الوحيد الى مجبش هديه وكل الاولاد هيضحكو عليك
حماده: طب انا اعمل ايه دلوقتى. انا صرفت كل المصروف ومحوشتش اى حاجه خالص.
المدرس: شوف يا حماده. الام مش بتستنى الهديه. لكنها بتستنى كلمة كل سنه وانتى طيبه . هتفرح بيك بردو لو انت افتركتها وقولتلها. وشوف انت تقدر تقدم لمامتك ايه غير الهديه.

حماده: حاضر هفكر.

--------------------------------------------------------------------------------------------
الفصل الرابع: الحفلة:

يمر الوقت حتى ينتهى اليوم الدراسى ويبدا الاطفال فى التجمع للحفله .
ميدو: يلا يا حماده انت مفكرتش فى حاجه.
حماده: لا طبعا فكرت ولقيت الحل. انا رسمت صورة لماما.
هايدى: ميدو . حماده . انتو بتعملو ايه يلا عشان نلحق الحفله
ميدو: ثوانى بس عشان حماده بيرسم الرسمه بتاعته قبل ما نروح عشان يديها هديه لمامته
هايدى: ورينى كده الرسمه
الله يا حماده . حلوه اوووى الرسمه بتاعتك. اكيييد هتعجبها
حماده: بجد يا هايدى عشان انا زعلان اوى من نفسى.
هايدى: اه يا حماده حلوه اووى. وبص بقى كمان.
حماده: ايه
هايدى: انا هديك الورده الى انا زرعاها تحطها فى الجواب الى هتديه لمامتك.
عشان تكون شكلها حلو.
حماده: بس انا مش معايا جواب.
ميدو: انا هروح بسرعه اشترى جواب. يلا نجمع من بعض.
حماده وهايدى: خد الفلوس الى معايا بسرعه انا كمان .

فى الحفله:

تظهر ام حماده فى الحفله. وترى الجميع ماسكين الهدايا ماعدا هي
ترى حماده فتاخذه فى حضنها وهى يقترب فى تردد
الام: ايه يا حبيبى مالك زعلان كده ليه
حماده: لا مفيش يا ماما
الام: حد ضربك ولا حاجه
حماده: هو انا هسيب حد يضربنى يعنى. ده انا باكل كل يوم مربى. يعنى الى يكلمنى هلزقه
الام: هههههههه يا واد بطل لماضه وقولى في ايه مالك.
حماده: صراحة يا ماما انا نسيت اجيبلك هديه
الام: يا حبيبى . انت احلى هديه عندى.
حماده: طيب كل سنه وانتى طيبه ويعطيها الهديه

تفتح الهديه لتجدها لوحه جميله جدا. تاخذه فى حضنها . وتقوله اصحى يا حماااااااااااااااااااااااااااااااده


الفصل الخامس: فى البيت

صوت ديك. صوت منبه ترررررررررن ترررررررررررررن.
حماده قوووووووووووووم يا ابنى انت لسه نايييم.
ينظر اليها: هو انا كنت نايم.
الام: طبعا يا حبيبى ما انت دايما ناييم على نفسك.
الطفل: مش النهارده اجازه عشان عيد الام.
الام: كل يوم عندك اجازه ده ايه ده. لسه ناقص شهر على عيد الام يا حبيبى. قوووم بطل دلع
حماده يقفز من على السرير: هيه هيه هيه النهارده مش عيد الام. هقدر احوش هيه هيه هيه. ................. الختام.


كتبها : احمد زكريا
اهداء الى كل ام